8 თებერვალი – ყოველი ქართველისთვის ორმაგად დიდებული თარიღი
დავით აღმაშენებლის ხსენების დღეს და დედაუნივერსიტეტის დაარსების დღეს ეძღვნება “ქართული ერთობის დარბაზის” დამფუძნებელთა განცხადება:
8 თებერვალი ყოველი ქართველისთვის ორმაგად დიდებული თარიღია.
სწორედ ეს დღე საქართველოს ფუძეჩამყრელის, სახელმწიფოს გამაერთიანებელისა და არნახულად გამაძლიერებელის – დავით აღმაშენებელის ხსენების დღე.
სწორედ ამ დღეს მოევლინა საქართველოს სულიერების განმანათლებლობის უპირველესი ბასტიონი და საცავი – დედაუნივერსიტეტი.
შემთხვევითი როდია ამ ორი უდიდესი მოვლენის დამთხვევა, ისევე, როგორც შემთხვევითი როდია, უნივერსიტეტის ბასტიონად და საცავად მოხსენიება.
ქართველ მეფეებს ხომ დარბაზობისას ერთ მხარეს მხედართმთავრები ესხდნენ, მეორე მხარს კი მოძღვართ-მოძღვარი უმშვენებდათ და უძლიერებდათ.
საქართველოს ყოველთვის თანაბრად იცავდა ხმალი და წიგნი, ვაჟკაცობა და განსწავლულობა.
დღეს, როგორც არასდროს, ერის ყოფნა-არყოფნა დამოკიდებულია ინტელექტუალური საუნჯის სიმდიდრეზე, გამრავლებაზე და დაცულობაზე.
„ქართული ერთობის დარბაზი“ ყოველთვის იყო, არის და იქნება დედაუნივერსიტეტის უერთგულესი თანამდგომი, თანამებროლი,მეგობარი.
ქართული ერთოის დარბაზის დამფუძნებლები:
გიგა ბთიაშვილი, ტარიელ ხარხელაური, არნოლდ გეგეჭკორი, თემურ გუგუშვილი, რომან რურუა, ომარ მხეიძე, გივი თოიძე, ანზორ ერქომაიშვილი, რამაზ ყურაშვილი