წერილი საქართველოს მეცნიერებათა აკადემიის პრეზიდენტს
20 ივნისს, “თეთრების” ლიდერმა წერილით მიმართა საქართველოს მეცნიერებათა ეროვნული აკადემიის პრეზიდენტს,აკადემიკოს გიორგი კვესიტაძეს.
ბატონო გიორგი,
ჩემთვის დიდი პატივია და უდიდესი პასუხისმგებლობაც, წარმოგიდგინოთ მიმართვის ტექსტი, რომელიც გადავეცი „ქართული ოცნების“ თავმჯდომარეს, ბატონ ბიძინა ივანიშვილს და ყველა პოლიტიკური პარტიის ხელმძღვანელს ქვეყნის მართვის სისტემასა და არჩევნებთან დაკავშირებით, რაც მთავარია, ქვეყანაში დღეს შექმნილი მდგომარეობიდან გამომდინარე, ეროვნული თანხმობის პარლამენტის შექმნის აუცილებლობის თაობაზე.
პირადად მე ამ წერილს მივიჩნევ ჩემი პოლიტიკური ბიოგრაფიის ერთ-ერთ უმნიშვნელოვანეს ნიშანსვეტად, რამეთუ ის შევადგინე მეცნიერებისადმი ჩემი ტრადიციული განწყობისა და მეცნიერთა იმ ჯგუფის ნააზრევზე დაყრდნობით, რომელმაც დიდ მამულიშვილთა მიერ შექმნილი მოქმედების მანიფესტის, „ერთი სამშობლო, ერთიანი ერი, გაერთიანებული სახელმწიფო“ მოსაზრებათა გათვალისწინებით, ორწლიანი მუშაობის შედეგად, შექმნა და ერთი წლის წინ წიგნებად გამოსცა ქვეყნის განვითარების კონცეფცია: „გზა ცივილიზებული სახელმწიფოსკენ“ და პროგრამული დოკუმენტი, ,,ახალი განზომილება – რა შევცვალოთ, რომ გადავრჩეთ“. მქონდა პატივი, ეს პროგრამული დოკუმენტები თქვენთვის გადმომეცა.
ბატონო გიორგი,
დიახ, ჩემთვის უდიდესი პასუხისმგებლობაა, რომ ამ წერილს გადმოგცემთ თქვენ, ცნობილ მეცნიერსა და მოღვაწეს, უდიდესი ტრადიციების მქონე საქართველოს მეცნიერებათა ეროვნული აკადემიის პრეზიდენტს, პიროვნებას, რომლის მოსაზრებებს ჩემთვის ყოველთვის, ყოველ ეტაპზე განსაკუთრებული მნიშვნელობა ჰქონდა და აქვს.
დიდ პატივს დამდებთ, თუ გაეცნობით და საჭიროდ ჩათვლით შეხვედრას. გეახლებით თქვენთვის მისაღებ ნებისმიერ დროს.
ღრმა პატივისცემით,
პოლიტიკური პარტია „თეთრების“ თავმჯდომარე,
თეიმურაზ შაშიაშვილი
მსგავსი შინაარსის წერილები დაეგზავნათ
- მეცნიერებათა აკადემიის ვიცე-პრეზიდენტს, აკადემიკოს როინ მეტრეველს
- მდივან- აკადემიკოსს, რამაზ ხუროძეს
- აკადემიკოს ოთარ ნათიშვილს
- აკადემიკოს თამაზ შილაკაძეს
- მეცნიერსა და საზოგადო მოღვაწეს, პარმენ მარგველაშვილს
იხ. მიმართვა “ქართული ოცნების” თავმჯდომარეს, ბიძინა ივანიშვილს
