(Taimer.ge) თემურ შაშიაშვილი: ქვეყნის მართვის მექანიზმი თავიდან ბოლომდე შესაცვლელია
“მოქკავშირ – აღორძინება – ნაცმოძრაობის” მიერ დამკვიდრებული ქვეყნის მართვის მექანიზმი იმდენად ავადმყოფი მექანიზმია, რომ მისი გამოჯანმრთელება შეუძლებელია და თავიდან ბოლომდე შესაცვლელია. ამის შესახებ, “თეთრების” ლიდერი, თემურ შაშიაშვილი აცხადებს. მისი მოსაზრებით, ეს ერთი კონკრეტული მაგალითითაც დასტურდება.
“რაც გინდა ის თქვი პრესით, ტელევიზიით, არც არავინ გპასუხობს, არც ვინმე რამეს გეკითხება. იგნორირება, რომელიც დაამკვიდრა სააკაშვილმა გრძელდება. ასეთმა მიდგომამ ჭორიკნობა დაამკვიდრა მედია საშუალებებში და საერთოდ, პოლიტიკაში. ეს არ არის მედიის ბრალი, ეს ხელისუფლების ბრალია. მთელს მსოფლიოში ასეა – თუ ჩინოვნიკზე, ან პოლიტიოსზე კომპრომატი დაიდო, ან სასამართლოში თავი უნდა იმართლოს, ან თანამდებობა დატოვოს. დემოკრატიული სამყარო ასეა აგებული.
ქვეყანაში მთავარი დემოკრატიული მექანიზმი წაიშალა. არც ტყუილის თქმის ეშინიათ, არც მართლის თქმის. ეს ვაკხანალია და ანარქიაა”. – აცხადებს შაშიაშვილი.
პოლიტიკოსის თქმით, სააკაშვილი, რეალურად, ამით ცხოვრობდა. ივანიშვილს კი ასეთი ანარქიული სისტემა არ აწყობს.
“მეგონა, პრემიერი სახელმწიფო მოხელეებს მედიის ბრალდებებზე სასამართლო წესით თავის მართლებას მოსთხოვდა ან თანამდებობის დატოვებას აიძულებდა. ამით დამთავრდებოდა ეს ჭორიკნობა. ვერავინ გაბედავდა ტყუილის თქმას. მინდა ვიფიქრო, რომ ბატონი ივანიშვილი ქართული პოლიტიკის სისუფთავისათვის ამ უმნიშვნელოვანეს გადაწყვეტილებას მიიღებს. კარგი იქნება, თუ ამ დიდ საქმეს საწყისი მის ხვალინდელ ბრიფინგზე დაედება”. – აცხადებს თემურ შაშიაშვილი.
