(reportiori.ge) თემურ შაშიაშვილი: პროკურატურას გადავეცი 600-გვერდიანი მასალა! ამას უკავშირდება ჟვანიას მკვლელობა!
გარდაცვლილი პრემიერ-მინისტრის ზურაბ ჟვანიას საქმეზე, საქართველოს მთავარ პროკურატურაში პარტია„თეთრების“ ლიდერი თემურ შაშიაშვილია დაბარებული. საგამოძიებო უწყების კითხვებს პარტიის ლიდერი მომავალ კვირაში – ოთხშაბათს ან ხუთშაბათს უპასუხებს.
„სასიამოვნოა, რომ პროკურატურას გაუჩნდა სურვილი – შედგეს ამ თემაზე ჩემთან საუბარი. პრინციპულზე პრინციპულია ჟვანიას საქმის გამოძიება. ჩვენ პროკურატურას გადავეცით 600-გვერდიანი მასალა საქართველოს მოსახლეობის გენოციდის შესახებ, ამ გენოციდის შემადგენელი ნაწილი იყო ზურაბ ჟვანიას მკვლელობაც.
მეორე მნიშვნელოვანი საკითხი, რომლის შესახებაც ჩვენ ვაცნობეთ პროკურატურას – ჟვანიას ჰქონდა სხვა მოსაზრება სტრატეგიული ობიექტების გასხვისებასთან დაკავშირებით და აშკარაა, რომ ძალიან დიდი დოზით ის შეეწირა ამ ყველაფერს.
ანუ ორი საკითხია, რაც მივაწოდეთ პროკურატურას – ესაა მეცნიერთა დასკვნა საქართველოს მოსახლეობის გენოციდის შესახებ და მეორე დოკუმენტი ეხება ქვეყნის მთავარი ეკონომიკური ღერძის: ჭიათურა, ზესტაფონი, ტყიბულის საბადოების საკითხს – ამას უკავშირდება ჟვანიას მკვლელობა“, – აცხადებს შაშიაშვილი.
