(sazogadoeba))თემურ შაშიაშვილი: მოსახლეობამ პოლიტიკურ პარტიებს უნდა წაართვას საარჩევნო კოდექსზე მონოპოლია
დღეს გარკვეულმა პოლიტიკურმა ძალებმა გააქტიურეს საუბარი არჩევნებზე და საარჩევნო კოდექსზე. ამასთან დაკავშირებით პარტიის პოზიცია გააჟღერა „თეთრების“ ლიდერმა თემურ შაშიაშვილმა.
„ჩვენ არ ვიზიარებთ არც სახელისუფლებო ძალთა, არც არასაპარლამენტო ოპოზიციად წოდებული პოლიტიკური გაერთიანების პოზიციას. ბატონმა ივანიშვილმა პოლიტიკურ პარტიათა ერთი ნაწილი გაამარგინალა და ამით გააბოროტა, მეორე ნაწილი კი გააფეტიშა. სწორედ ამ ორი ძალის ჭიდილი მიდის დღეს, – აცხადებს თემურ შაშიაშვილი.
მისი თქმით, საარჩევნო კოდექსი უნდა იყოს ხალხისთვის და არა პარტიებისთვის. არ შეიძლება მასზე მონოპოლია ჰქონდეს პოლიტიკურ ძალებს, თუნდაც ხელისუფლებას. საარჩევნო სისტემაზე უნდა მუშაობდეს არა პოლიტიკური პარტიები, არამედ მეცნიერები და ამ საქმის მცოდნე განათლებული ადამიანები. იმიტომ რომ მეცნიერი ფიქრობს ქვეყანაზე, პოლიტიკოსი კი საკუთარ პოლიტიკურ ინტერესებზე.
„გავიხსენოთ 1990 წლის არჩევნები, რომლებიც იყო ჩვენის აზრით საუკეთესო. მაშინ საარჩევნო კომისიის თავმჯდომარე იყო მეცნიერი, აკადემიკოსი ჟორდანია, კომისია დაკომპლექტებული იყო მეცნიერებით.
დღეს, ერთის მხრივ, ხელისუფლებაში მყოფი ძალები, რომლებიც ხუთიოდ წლის წინ იყვნენ პოლიტიკური რვიანის შემადგენლობაში, უარყოფენ თავისსავე ხელმოწერილ მოთხოვნებს. მეორეს მხრივ, თერთმეტი პარტიის გაერთიანება, რომელიც მთელი არასაპარლამენტო ოპოზიციის სახელით საუბრობს, რეალურად კი იგნორირებას უკეთებენ პარლამენტს გარეთ მყოფ სხვა ოპოზიციურ პარტიებს, ებრძვის მაჟორიტარულ საარჩევნო სისტემას, მაშინ როცა რასაც ხელისუფლებაში ყოფნის დროს მათივე წარმომადგენლები იგივე მაჟორიტარულ სისტემას მხარს უჭერდნენ.
„თეთრების“ არასდროს ვიქნებით იმ შეკრებების მონაწილე, სადაც მხოლოდ პოლიტიკური პარტიები იქნებიან . ჩვენთვის მიუღებელია, როგორც სახელისუფლებო ძალთა პოზიცია, ასევე ე.წ. არასაპარლამენტო პარტიების მოთხოვნა . რადგან მიგვაჩნია, რომ ორივე ძალა ორიენტირებულია ე.წ. ბელადზე. სწორედ პროპორციული სისტემა გულისხმობს ფულით და ბელადის ავტორიტეტით არჩევნების მოგებას. ჩვენი პრინციპი კი ასეთია – ქვეყანას გადაარჩენს არა ფულიანები და ბელადები, არამედ განათლებული ადამიანები. სწორედ ამიტომ ვაკეთებთ აქცენტს მეცნიერებსა და მეცნიერებათა აკადემიაზე. კიდევ ერთხელ ვიმეორებთ, საჭიროა სისტემური ცვლილებები. დღეს მოსახლეობამ პოლიტიკურ პარტიებს უნდა წაართვას საქართველო და საარჩევნო კოდექსზე მონოპოლია“ – აცხადებს „თეთრების“ ლიდერი.
